1Ch 22 | NdeIBE | STEP | UDavida wasesithi, “Indlu kaJehova uNkulunkulu izakuba khonapha, kanye lealithare lomnikelo wokutshiswa ka-Israyeli.”

1 Chronicles 22

1 UDavida wasesithi, “Indlu kaJehova uNkulunkulu izakuba khonapha, kanye lealithare lomnikelo wokutshiswa ka-Israyeli.”

Amalungiselelo Okwakha Ithempeli

2 Ngakho uDavida wakhupha ilizwi lokuthi bonke abezizweni abahlala ko-Israyeli babuthaniswe, kwathi phakathi kwabo wakhetha ababazi bamatshe ukuze balungise babaze amatshe okwakha indlu kaNkulunkulu.

3 Wabuthanisa insimbi enengi kakhulu yokwenza izipikili zezivalo lezinsimbi zokuhlanganisa, wabuthanisa lethusi elinengi elingelakulinganiswa. 4 Wadinga lezigodo zomsedari ezinengi ezingelakubalwa, ngoba amaSidoni labaseThire baletha inani lazo elikhulu kakhulu kuDavida.

5 UDavida wasesithi, “Indodana yami uSolomoni isengumntwana njalo ayikabi lolwazi, ngoba phela indlu ezakwakhelwa uJehova kumele ibe yindlu ebukekayo kakhulu ibe lodumo lesithunzi emehlweni ezizwe zonke. Ngakho ngizalungiselela ukwakhiwa kwayo.” Yikho uDavida walungiselela ngokujulileyo esaphila.

6 Wasebiza uSolomoni indodana yakhe, wamlaya ukuthi akhele uJehova uNkulunkulu ka-Israyeli indlu. 7 UDavida wathi kuSolomoni: “Ndodana yami, ngangizimisele ukwakhela iBizo likaJehova uNkulunkulu ka-Israyeli indlu.

8 Kodwa ilizwi likaJehova lafika kimi lisithi: ‘Wena uchithe igazi elinengi, walwa izimpi ezinengi. Kawuyikwakhela iBizo lami indlu, ngoba uchithe igazi elinengi kakhulu emhlabeni. 9 Kodwa, uzazala indodana ezakuba ngumuntu othanda ukuthula; ngizayiphumuza ezitheni zayo inxa zonke. Izathiwa nguSolomoni, njalo ngizanika u-Israyeli ukuthula ezinsukwini zokubusa kwakhe.

10 Nguye ozakwakhela iBizo lami indlu. Uzakuba yindodana yami, mina ngizakuba nguyise. Njalo ngizaqinisa ubukhosi bakhe ko-Israyeli kuze kube nininini.’

11 “Ndodana yami, uJehova kabe lawe ukuze uphumelele ukwakha indlu kaJehova uNkulunkulu wakho, njengokutsho kwakhe ngawe. 12 Sengathi uJehova angakunika ukuhlakanipha lokuqedisisa, ukuze kuthi lapho ekunika amandla ko-Israyeli, uwulondoloze umlayo kaJehova uNkulunkulu wakho.

13 Uzaphumelela nxa unanzelela ukugcina izimiso lemithetho uJehova ayinika u-Israyeli ngoMosi. Qina, ube lesibindi. Ungesabi utshaywe luvalo.

14 “Ngayo yonke imizamo yami ngilungisele indlu kaJehova amathalenta egolide ayizinkulungwane ezilikhulu, lamathalenta esiliva ayisigidi, lethusi kanye lensimbi okulesisindo esingelakubalwa, lezigodo kanye lamatshe. Lawe ungengezelela kulokho.

15 Ulezisebenzi ezinengi, ababazi bamatshe, labakha ngamatshe, lababazi, lezingcitshi zemisebenzi yonke, 16 eyegolide, isiliva, ithusi kanye lensimbi – izingcitshi ezingelakubalwa. Qalisa-ke umsebenzi, uJehova abe lawe.”

17 UDavida waselaya bonke abakhokheli bako-Israyeli ukuba basize uSolomoni indodana yakhe. 18 Wathi kubo, “UJehova uNkulunkulu wenu kakho kini na? Kalinikanga ukuthula nxa zonke na? Ngoba unikele abantu belizwe esandleni sami, lelizwe libuswa nguJehova labantu bakhe. 19 Ngakho nikelani izinhliziyo zenu ekufuneni uJehova uNkulunkulu wenu. Qalisani ukwakha indlu kaJehova uNkulunkulu, ukuze ibhokisi lesivumelwano sikaJehova lezitsha zikaJehova ezingcwele kungeniswe ethempelini elizakwakhelwa iBizo likaJehova.”